ბორჯომის მუნიციპალიტეტის დასახლებებში, საქართველოს რეგიონებში განსახორციელებელი პროექტების ფონდიდან, „სოფლის მხარდაჭერის პროგრამით“ დასაფინანსებელი პროექტების შერჩევის მიზნით მოსახლეობასთან საკონსულტაციო შეხვედრები დაიწყო.

დაბა ახალდაბაში და სოფელ ყვიბისში გამართულ საერთო კრებებს და საკონსულტაციო შეხვედრას ბორჯომის მუნიციპალიტეტის მერის მოადგილე გიორგი ტაბატაძე, მერიის, საკრებულოს და დეპუტატის ბიუროს თანამშრომლები ესწრებოდნენ.

ადგილობრივი თვითმმართველობის წარმომადგენლებმა სოფლების ყვიბისის და ახალდაბის მაცხოვრებლებთან ერთად სოფლებში არსებული საჭიროებების მოგვარებაზე და პროგრამის ფარგლებში განსახორციელებელ ძირითად პრიორიტეტებზე იმსჯელეს. ადგილობრივებმა ხმათა უმრავლესობით შეარჩიეს რას მოხმარდება დასახლებებისთვის გამოყოფილი თანხა.

აღსანიშნავია, რომ 2023 წელს ბორჯომის მუნიციპალიტეტს „სოფლის მხარდაჭერის პროგრამით“, საქართველოს რეგიონებში განსახორციელებელი პროექტების ფონდიდან 436 000 ლარი გამოეყო, რასაც ადგილობრივ ბიუჯეტში გათვალისწინებული 872 000 ლარი დაემატება. თითოეულმა სოფელმა მცირე ინფრასტრუქტურული პროექტის განსახორციელებლად თანხა მოსახლეობის რაოდენობის გათვალისწინებით მიიღო.

საკონსულტაციო შეხვედრები 13-დან 22 თებერვლამდე მუნიციპალიტეტის ყველა სოფელში გაიმართება და შერჩეული პროექტები დასამტკიცებლად ბორჯომის მუნიციპალიტეტის საკრებულოს წარედგინება.